زهير كاطع الحسيني
كُرسي ألوظيفه !
ــــــــــــــــــــــــــــــــــــ
إسنيين نايم بالعَسَل ْ
تاليها وبغفلة زَمن
تِتهم غيرك بالكسَل ْ
سِبحان مِن خلّه الدَغل
بين الورد
يترك أثر ْ
سِبحان مِن خلّه البَغل
يلعب شناوو
وما إنكسر!
إسنيين عُمرك
علّ رصيف
إتشطّب أيام التِمر
تِترقب إلشايل حِمِل
ياريته يوكَع بالدرب
وإتعثّر إلصاحِب إلك
توكَفله خووو يَم ّ إلمَطَب ْ
تتشفه وحدك بالحِصَل
تاليها تِصعَد .. يا بطل ْ؟!!
.........
صاير إتعاقب بالنَقِل ْ
إتوبّخ..
إتصدّر أمر
ما جَنك على ذاك الدَرب
سابِق فِعِل ْ
ياريت لو تكَعد عَوج
تحجي العَدِل ْ
لا تخربط خيوط الغَزِل
كَالوووولي
مسؤول إصبَحِت
أواه مِنك يا زمَن
كُرسي الوظيفه
وما حِمَل ..
إشكثر ..
يتحَمل دَجَل ْ؟!!!!
