تعال وياي ننسى همومنه البينه
أو إيد بإيد نعبر فوك ماضينه
تعال وياي نرسم للحزن تابوت
ونشيِّعْ جرحنه الجان ياذينه
خل نبني مناره نباهي بيهه الكون
أو على خدود المناره انعلك أسامينه
ونحبه ابكثر ما بالعراق اجروح
أوكد ما للوطن شبان زفينه
إحنه ابعينَّه شفنه حلمنه ايبات
أشَّرنا حلمنه أو كمنا صلينه
لأن طبع المحب مرات من يشتاك
بس صورة حبيبه ايشوفهه ابعينه
إحنه بلون واحد بس طبعنه اشكال
مره انصير ورده أومره سجينه
أو فرق بين الورود البلحديقة اتفوح
أو بين الغافيه ابسندانه للزينه
جنَّه اسنين نحلم والوطن مذبوح
أوجان ابسد حزنه اتلوذ أمانينه
جنَّه انخاف من يندك علينه الباب
جان الموت يخطف حدر رجلينه
جم مره إبَّنادقنه اعتنينه الموت
صوَّبنه أو لكينه اصوابهن بينه
جم مره انتفضنه أوصحنه باعلى الصوت
بس ناكل بعضنه البعض ردينه
جم مره سمعنه حسين بينه يصيح
وشفنه الدم يسيل وكلنه شعلينه
جم صدر انذبح وجَّم شهيد الطاح
جم جربه التسيل أو تعطش سكينه
من صلى الصدر صلَّتْ وراه آلاف
بس من طاح لذنه ابسد جفافينه
ضمينه الجفوف أونلطم اعله حسين
ونصَيِّحْ نطه العباس جفينه
موهيَّه الطفوف ابكل عصر تنعاد
بس وين الموالي الينتخي الدينه
أمس كام الحسين الدمنه يطلب ثار
صدَّكنه يزيد أوبيه شكينه
واحنه البايعينه احسين ويه الناس
بس ابمجلس إبن زياد غنينه
عفنه اعثوك أهلنه الغير أهلنه أتروح
وبّاب الدول تمرات جدّينه
من كد ما تعودنه الظلام الحاد
كمنه انخاف خاف النور يعمينه
غضينه النظر عن الحرامي الجاي
يشرب دم شعبنه أوكلنه يحمينه
غيمه أوين ما تمطر دخلهه أتروح
ما عاد الخراج ابجيبنه أيجينه
واحنه الجانت الدنيا من اسمنه تخاف
أو ما بين الدول مهيوب طارينه
عراقيين زحنه من المنايا الضيم
وبوجه الظلام اشموس ضوينه
ما يطفينه ماي الدنيا من انثور
بس دمعة طفل جوعان تطفينه
علسنه همومنه من الجوع وكت الجوع
أو غمَّسنه جرحنه بدم أهالينه
زحنه الكرب عنَّه ابغير جف فلاح
أو مثل شبة نخل بالكاع شبينه
