وبتسالينى كتير | سعيد شكري

طيب هقولك إيه ..؟!!
عن شئ لمس قلبى
دقة ورا الدقة ..
بيحلفك خبى
خبى العيون خبى
انا اصلى ماستحملش ..!!

قلبى عديم الفرح
يمكن مجربهوش
والجو ده ماعاشتوش
غير النهاردة وبس
لكن ماعيبهوش ..!!
مانكرش كان بيحس
إحساس بيشبهله
لكن مافسرهوش ..!!

طيب هقولك إيه ..؟!!
وانتى اللى حسانى
وتملى وحشانى
حتى وانا ف حضنك
وبتدفنى حزنك
ف حضن اوجاعى
حزنك مالوش داعى
وانا كتفى شيالك
يلا إفردى شالك
وعطرى دراعى ..!!
عرق الحبيب ياسمين
لمسة إيديه ... حنة
دمع الحبايب نار
وانا نفسى ف الجنة ..!!

يالحظة تجمعنا
وبخاف اوى لتفوت
وادبل على عودك
ماتفكريش ف الموت
ووجودى ف وجودك
وياريتنى كنت اقدر
وانا اوهبك عمرى
ياحلم متفسر
سلمت له امرى ..!!

طيب هقولك إيه ..؟!!
بستسمحك لحظة
عندى هنا ملاحظة
ده الحب بالتأكيد
خارج نطاق الوصف
وانا قلبى لسه جديد
ومكتفاه بالعرف
وعادتنا والتقاليد ..!!